O'zbekiston futbol assotsiatsiyasi (O'FA) milliy terma jamoalar sobiq direktori Azizbek Haydarov JCH-2026 guruh bosqichi 2-turidan o'rin olgan, O'zbekiston terma jamoasining Portugaliyaga yirik (0:5) hisobda imkoniyatni boy bergan o'yini haqida keskin fikr bildirdi.
Mundial startidagi ketma-ket ikkita mag'lubiyatdan so'ng, italiyalik mutaxassis Fabio Kannavaro shogirdlari "K" kvarteti turnir jadvalida so'nggi o'rinni egallab turishibdi. Guruh bosqichining so'nggi turida Osiyo vakillari DR Kongo terma jamoasiga qarshi hal qiluvchi bahsda maydonga tushadilar.
- Biz bu o'yinni boy berdik, - dedi Haydarov qatiy ohangda. - To'g'risini aytsam, Fabio Kannavaro nimaga erishmoqchi bo'lganini umuman tushunmadim. Birinchi gol o'tkazib yuborilgan vaziyatda himoyachilarimiz himoyalanish va to'pni olib qo'yish bilan emas, balki suratga tushish yoki boshqa xohlagan ish bilan band bo'lishdi. Jahon chempionatida bunday gollarni o'tkazib yuborish mutlaqo mumkin emas. Ikkinchi vaziyatda esa Abbosbek Fayzullaev to'pdan qochdi. Uning nima uchun bunday qilganini umuman tushunmadim. Mening bilishimcha, shu paytgacha futbol to'pi tekkani uchun hech kim o'lib qolmagan. Bunday darajadagi musobaqada har bir vaziyatda oxirigacha kurashish kerak.
O'FA sobiq rahbarining fikricha, aynan uchrashuv boshidagi individual xatolar tablodagi yirik mag'lubiyatni oldindan belgilab bergan.
- Eng asosiysi - agar Portugaliyadek jamoaga qarshi o'yinda shunday gollar o'tkazib yuborsangiz, keyin o'yinga qaytishning deyarli iloji bo'lmaydi, - deya so'zida davom etdi ekspert. - Birinchi goldan keyin ishonchni yo'qotdik, ikkinchisidan so'ng esa yanada qiyinlashdi. Jahon chempionatida bunday darajadagi raqiblar xatolarni kechirmaydi. O'yinni o'nglay olmadik, yana uchta gol o'tkazib yubordik va shu sababli bahs yirik mag'lubiyat bilan yakunlandi. Bunday jamoalarga qarshi birinchi daqiqadan to so'nggi soniyagacha maksimal darajada diqqatli bo'lish lozim. To'g'risini aytsam, Fabio Kannavaroni O'zbekiston terma jamoasiga nima uchun taklif qilishganini umuman tushunmayapman. Unga shuncha pul to'lashdan ne naf? Bu mablag' evaziga jamoani futbolimizni, futbolchilarimizni va mentalitetimizni yaxshi biladigan o'zimizning mutaxassislarga topshirsa bo'lardi.
