O‘zbekistonlik UFC jangchisi Nursulton Ro‘ziboyev 2026 yilgi jahon chempionati doirasidagi O‘zbekiston — Portugaliya uchrashuvi oldidan o‘z fikrlari bilan o‘rtoqlashdi.
— Seshanba kuni O‘zbekiston Portugaliyaga qarshi maydonga tushadi. Sizning Krishtianu Ronaldu muxlisi ekaningizni bilamiz. Bu o‘yinda kimga muxlislik qilasiz?
— O‘zbekiston kim bilan o‘ynamasin, men doim O‘zbekistonga muxlislik qilaman. Shu bilan birga, men Krishtianuni ham yaxshi ko‘raman, ammo o‘z mamlakatimni undan ham ko‘proq qo‘llab-quvvatlayman. Men Ronalduni bolaligimdan kuzataman. Uning «Manchester Yunayted», «Real» va hozirgi «An-Nasr»dagi o‘yinlarini tomosha qilaman. Uning rekordlari, gollari hamisha diqqatim markazida. Ammo bu o‘yinda, albatta, O‘zbekiston uchun muxlislik qilaman. Agar Portugaliya guruhdan chiqsa, keyingi bosqichlarda Ronalduni qo‘llab-quvvatlayman, — dedi Ruziboyev.
Jangchidan ideal natija qanday bo‘lishi haqida ham so‘raldi.
— Demak, ideal variant — O‘zbekiston g‘alabasi va Ronalduning goli?
— Ha, Ronalduning bu jahon chempionatida gol urganidan xursand bo‘lardim. Lekin eng katta quvonchim O‘zbekistonning g‘alabasi bo‘ladi, — dedi UFC vakili.
Eslatib o‘tamiz, O‘zbekiston — Portugaliya uchrashuvi 23 iyun kuni AQSHning Xyuston shahrida bo‘lib o‘tadi.
Shuningdek, Nursulton Ro‘ziboyev 27 iyun kuni Ozarbayjonning Boku shahrida o‘tadigan UFC turnirida rossiyalik Andrey Pulyayevga qarshi oktagonga ko‘tariladi.
