Belgiya milliy terma jamoasi va “Manchester Siti” klubi vingeri Jeremi Doku o‘zining birinchi farzandi tug‘ilishi munosabati bilan Jahon chempionati qarorgohini tark etish niyatida ekanligini ma’lum qildi. Uning bu qarori futbol jamoatchiligida turlicha bahslarni keltirib chiqardi.
24 yoshli futbolchining rafiqasi iyul oyining ikkinchi haftasida farzandli bo‘lishi kutilmoqda. Doku hatto Belgiya terma jamoasi turnirda o‘z ishtirokini davom ettirayotgan (masalan, chorak final bosqichida) bo‘lsa ham uning yoniga qaytishni rejalashtirmoqda.
“Bu mening to‘ng‘ich farzandim, shuning uchun albatta u yerda bo‘lishni xohlayman. Hech kim o‘z farzandining tug‘ilishini o‘tkazib yuborishni istamaydi. Biroq men futbolda boshqa omillar ham borligini tushunaman. Federasiya har doim o‘yinchilarni qo‘llab-quvvatlaydi va vaziyatimizni to‘g‘ri baholaydi. Nima qila olishimizni vaqt ko‘rsatadi”, dedi Doku Reuters nashriga bergan intervyusida.
Biroq, futbolchining AQSHdagi turnirni tashlab, uyga qaytish rejasi Fransiyaning L'Equipe kanali boshlovchisi Frans Pyerron tomonidan keskin tanqid qilindi. U o‘zining ijtimoiy tarmoqdagi sahifasida farzand tug‘ilishida otaning ishtiroki borasida o‘ta bahsli fikr bildirdi:
“Jahon chempionati — bu baxt. Sening o‘rningda bo‘lishni orzu qiladigan yuzlab futbolchilar bor. Bunday imkoniyat hayotingda boshqa hech qachon berilmasligi ham mumkin. Sen bolalikdagi orzuying bilan yashayapsan, lekin farzandingning tug‘ilishida ishtirok etish uchun bularning barchasidan voz kechmoqchisan. Yoqimsiz eshitilsa ham aytaman, bu shunday jarayonki, unda otaning umuman keragi yo‘q”.
Pyerronning ushbu so‘zlari internetda katta rezonans keltirib chiqardi va ko‘pchilik Dokuning yonini oldi. Xususan, boks bo‘yicha 2000-yilgi Olimpiada chempioni fransiyalik Braim Aslum shunday yozdi: “Chaqaloq — bu sening butun hayoting. Jahon chempionati esa qachondir tugaydi”.
Keyinroq, Pyerron o‘zining X (sobiq Twitter) sahifasida bayonot berib, uzr so‘rashga majbur bo‘ldi. “Men shunchaki bahsli mavzu atrofida o‘z shaxsiy fikrimni bildirgandim. Tushunaman, bu so‘zlarim kimlargadir og‘ir botgan bo‘lishi mumkin, buning uchun uzr so‘rayman. Otalarning o‘rni va rolini pasaytirish niyatim bo‘lmagan”, deb yozadi teleboshlovchi.
Ma’lumot uchun, Jeremi Doku kasalligi sababli G guruhining 2-turidan o‘rin olgan Eron terma jamoasiga qarshi bahsni o‘tkazib yubordi. Rudi Garsiya shogirdlari ushbu bellashuvda 0:0 hisobida durang (1:1) o‘ynadi.
