FIFA Klublar o‘rtasidagi Jahon chempionati ishtirokchilari sonini 32 tadan 48 tagacha kengaytirishga yaqin turibdi. Bu o‘zgarish 2029 yilda bo‘lib o‘tadigan navbatdagi turnirdayoq kuchga kirishi mumkin. Britaniyaning The Guardian nashri xabar berishicha, bunga FIFA va Yevropa klublari birlashmasi (EFC) o‘rtasidagi yangi kelishuv zamin yaratmoqda.
Manbaning ma’lum qilishicha, tomonlar turnirni tashkil etish va uning tijoriy rivojlanishi bilan shug‘ullanuvchi qo‘shma korxona tuzishga kelishib olganlar. Ushbu hamkorlik musobaqani kengaytirish jarayonini tezlashtirishi kutilmoqda.
2025 yilgi turnirda Yevropa sharafini 12 ta klub himoya qilgan edi, biroq "Liverpul", "Barselona" va "Napoli" kabi grandlar musobaqadan chetda qolishdi. Amaldagi saralash tizimiga ko‘ra, turnirda Chempionlar ligasining so‘nggi g‘oliblari va UEFA reytingida eng yuqori o‘rinni egallagan klublar ishtirok etishi belgilangan bo‘lib, bitta mamlakatdan faqat ikkita jamoa qatnashishiga cheklov qo‘yilgan edi.
EFC ushbu limitni bekor qilishga erishmoqchi. Agar bu o‘zgarishlar qabul qilinsa, ingliz klublari qo‘shimcha o‘rinlarga ega bo‘lishi mumkin, chunki "Arsenal", "Liverpul" va "Manchester Siti" klublari UEFA reytingining kuchli sakkiztaligidan joy olgan.
Tashkilotdagilarning fikricha, yevropalik ishtirokchilar sonining ko‘payishi turnirning tijoriy jozibadorligini yanada oshiradi.
