Portugaliya terma jamoasi o‘z guruhida birinchi o‘rinni egallay olmadi va peshqadamlikni Kolumbiyaga boy berdi. So‘nggi turda bo‘lib o‘tgan o‘zaro bahsda jamoalar gol ura olishmadi (0:0). Portugaliyaliklar 5 ochko, kolumbiyaliklar esa 7 ochko jamg‘arishdi. Shu tariqa, ko‘pchilik intiqlik bilan kutayotgan Krishtianu Ronaldu va Lionel Messining maydondagi to‘qnashuvi endi faqatgina Jahon chempionati finalida sodir bo‘lishi mumkin — ular ungacha bo‘lgan bosqichlarda o‘zaro to‘qnash kelmasliklari endi aniq.
3 iyul kuni Portugaliya 1/16 final doirasida Xorvatiyaga qarshi maydonga tushadi. Bir kun o‘tib esa, Argentina pley-offning ilk raundida Kabo-Verde bilan kuch sinashadi.
Katta ehtimol bilan, JCH-2026 ham Ronaldu, ham Messi uchun faoliyatlaridagi so‘nggi mundial bo‘ladi. Krishtianu shu yilning fevral oyida 41 yoshini kutib olgan bo‘lsa, Leo turnir davomida 39 yoshga to‘ldi.
