- "Kattaqo'rg'on"dagi faoliyatingiz qisqa kechdi. Avvalo, ushbu davr haqidagi fikrlaringiz bilan o'rtoqlashsangiz. Jamoada bu yil 3 ta murabbiy o'zaro o'rin almashdi...
- "Kattaqo'rg'on"ga borish-bormaslik haqida 2 oydan ortiq o'ylandim. Men uchun notanish liga edi: na futbolchilarni, na yaratilgan sharoitlarni bilardim. Klub prezidenti bilan muzokara o'tkazib, jamoani bir oy davomida o'rgangach, ahvol haqiqatan ham murakkabligiga amin bo'ldim.
Kelganimdan so'ng ancha ishlarni tartibga soldik. Natijalarimiz yomon emasdi, boz ustiga, jamoaga selekciya ishlari yakunlanib, tarkib to'liq shakllanib bo'lgan mahalda keldim. Birinchi davrada maksimal harakat qilib, ikkinchi davrada tarkibni yanada kuchaytirishni va Superligaga chiqishni maqsad qilgandik. Biroq ayrim sabablarga ko'ra bu rejamiz amalga oshmadi.
Yorqin Nazarovning ketish sababini tushunmay qoldim - jamoa 7 ta o'yinda 14 ochko jamg'arib turgandi. Kubokdagi mag'lubiyatdan so'ng murabbiy o'zgartirildi. Yuriy Utkulbaevning tayinlanishi esa men uchun ham kutilmagan syurpriz bo'ldi. Kim va nima maqsadda uni olib kelganini tushunmadim. Natijani esa barcha ko'rdi, uning nomzodi qayerdan paydo bo'lganidan hanuz bexabarman.
Ayni paytda jamoani Ilyos Zeytullaev boshqarmoqda va fikrimcha, bu juda to'g'ri tanlov. O'ylaymanki, Zeytullaev "Kattaqo'rg'on"ni maksimal darajada yuqoriga olib chiqa oladi.
- Mutaxassis sifatida ayting-chi, Proligadagi sifat, jamoalarning o'yini va ularning soni ortgani samaradorlik jihatdan qay darajada o'zini oqladi?
- Proligada ishlash men uchun yangi tajriba bo'ldi. Albatta, Superligada sharoit va saviya umuman boshqa darajada. Biroq Proliga ham avvalgi yillarga nisbatan sezilarli darajada kuchaygan. To'g'ri, ayrim jamoalarda oqsoqlanish kuzatilayotgani tabiiy hol, hamma bir xil saviyada bo'lolmaydi. Keyingi mavsumlarda klublar mavjud kamchiliklarni to'g'irlab, yanada kuchayishadi deb o'ylayman.
Eng quvonarlisi, Proligada yoshlarga imkoniyat ko'proq berilyapti va ular o'zlarini ko'rsata olishyapti. "Respublika FA", "G'azalkent", "Yaypan" kabi jamoalarning aniq maqsadi bor - yoshlarni katta futbolga tayyorlab berish. Bunday klublar ko'paysa, futbolimiz uchun faqat foyda. Superligaga o'ta olmay, o'rinbosarlar tarkibida qolib ketayotgan yoshlar uchun bu juda yaxshi imkoniyat. Umuman olganda, yangi formatdagi birinchi yil yomon o'tmayapti.
- Superliga bahslarini kuzatib boryapsizmi? Bu yilgi chempionlik imkoniyatlari va jamoalarning ishtiroki borasida fikrlaringiz qanday?
- Ilgari o'zim Superligada ishlaganim uchun futbolchilarning 70-80 foizini yaxshi bilaman. Aslida, Superliga darajasidagi o'yinchini Proligaga jalb qilish oson emas.
Superligani, albatta, kuzatib boryapman. Chempionlik uchun "Neftchi" va "Paxtakor" oxirigacha kurash olib boradi. "Navbahor" hamda OKMK esa bronza medallari uchun kurashmoqda. "Navbahor"da ham chempionlik ambiciyalari bor, ammo muayyan vaziyatlarda jamoa oqsoqlanib qolyapti. Shunga qaramay, ular o'yin sifati borasida ancha o'sishga erishdi. Timur Kapadze bor e'tiborini kubok va chempionlikka qaratgan.
"Paxtakor" va "Neftchi" esa birdaniga uchta frontda kurash olib bormoqda. "Neftchi"ning tajribasi bunday tig'iz taqvimda barqaror o'ynashga etadimi-yo'qmi - bu so'roq ostidagi masala. "Paxtakor" esa bunday bosimlarga allaqachon toblangan. Jamoalar o'rtasidagi chempionlik poygasi juda qiziq kechadi.
- Chempionatning "kuz-bahor" tizimiga o'tkazilishiga munosabatingiz aynan qanday? Xalqaro tajribangizdan kelib chiqib bunga qaysi mezonlar asosida baho berasiz?
- "Kuz-bahor" tizimiga o'tish borasida eng asosiy savol shu: biz bunga qanchalik tayyormiz?
Birinchidan, maydonlarimizning holati hanuz talab darajasida emas. Ikkinchidan, qishki tanaffusni qanday va qayerda to'ldiramiz? Yozda esa klublar selekciya ishlarini qay tartibda olib boradi? Chunki vaqt juda qisqa bo'lib qoladi.
Bizning sharoitimizda barqaror tashkillashgan klublar soni barmoq bilan sanarli. Ko'pchilik jamoalarda har yili 10-15 tadan futbolchi almashadi. "Kuz-bahor" tizimiga o'tishdan oldin puxta tayyorgarlik ko'rish va juda ko'plab omillarni hisobga olish lozim.
- Klublarimiz Osiyo Chempionlar Ligasida ishtirok etmoqda. "Paxtakor"ning Saudiya grandlaridan ochko olishida mutlaq ruhiy tayyorgarlik rol o'ynadimi yoki boshqa omillar ham mavjudmi?
- "Paxtakor" Elit OCHLda har yili muntazam ishtirok etib kelmoqda. Lekin 1 ochko olganimizga haddan tashqari xursand bo'lishimiz kerak emas. To'g'ri, raqiblarning byudjeti juda katta, tarkibida jahon darajasidagi yulduzlar bor. Ammo biz ulardan to'liq ustunlik qilib ochko tortib olayotganimiz yo'q.
"Paxtakor"ning so'nggi o'yinini olsak, "Al-Qodisiya" istalgan daqiqada o'yin suratini oshira oldi. Biz maydonda maksimal kuchimizni berib o'ynagan bo'lsak, ular bemalol harakat qilishdi.
"Neftchi"ga kelsak, ular OCHL uchun alohida futbolchilarni taklif etdi va umuman olganda yomon taassurot qoldirmayapti. "Al-Nasr"ga qarshi ham munosib qarshilik ko'rsata olishdi. Ular ancha yillik tanaffusdan so'ng yana shunday nufuzli turnirga qaytishdi. "Nasaf" ham chakki harakat qilgani yo'q, faqat o'z xatolari evaziga imkoniyatni boy berib qo'ydi.
- Milliy terma jamoamizning so'nggi yig'inlarda Suriya, Eron va Janubiy Koreyaga qarshi o'tkazgan o'yinlari sizning nigohingizda nimasi bilan yodda qoldi? Tarkibning yoshartirilayotgan jarayonini qanday baholaysiz?
- Terma jamoamizda o'sish juda katta. Hozir Eron bilan bemalol tengma-teng o'ynayapmiz, Suriyani esa xotirjam mag'lub etmoqdamiz. Janubiy Koreya bilan bahsda ham yomon futbol ko'rsatmadik, faqat individual xatolar pand berdi.
Tarkibning yoshartirilayotganiga juda ijobiy baho beraman. Masalan, Behruz Karimov jamoaga juda tez kirishib ketdi. Kelajakda - navbatdagi Jahon chempionati saralashida baribir avlodlar almashinuviga duch kelamiz. Yoshlarni hozir sinovdan o'tkazib olmasak, qachon ko'rib olamiz? Menimcha, tarkibga yanada ko'proq yoshlarni jalb etish lozim. Hozirgi terma jamoaning o'yini ko'pchilikka manzur bo'lmoqda.
- Rossiyalik tajribali mutaxassis Gadji Gadjiev Proliganing "G'azalkent" klubida ish boshlashga yaqin turibdi. Siz ushbu murabbiy bilan 2003 yili "Anji"da birga faoliyat yuritgansiz. Gadji Muslimovich haqidagi taassurotlaringiz va ushbu tayinlovning "G'azalkent" uchun ahamiyati haqida to'xtalsangiz...
- Gadji Muslimovich bilan 2003 yili "Anji" klubida birga faoliyat yuritganman. Yoshini e'tiborga olmasak, u juda kuchli mutaxassis va ajoyib psixolog. Futbolchilarni ruhan ruhlantirishni va uyg'otishni juda yaxshi biladi. Agar tajribasidan to'g'ri foydalana olsak, nafaqat "G'azalkent"ga, balki butun futbolimizga katta nafi tegadi.
Gadjievni aynan qaysi yo'nalishga olib kelishganini bilmadim-u, lekin "G'azalkent" uchun chin dildan xursandman. Menga bu klubning ish yuritish tizimi manzur bo'lyapti: yoshlar bilan ishlash, vitaminlashtirish, xorij yig'inlari va maydonda ko'rsatayotgan o'yini. Agar jamoa shu suratda davom etsa, yaqin yillarda bemalol Superligaga chiqa oladi.
