Xalqaro futbol federasiyasi (FIFA) 2027 yildan 2030 yilgacha bo‘lgan davrda futbolni moliyalashtirish hajmini 6,35 milliard dollarga yetkazish bo‘yicha taklifni taqdim etdi. Bu haqda tashkilotning rasmiy saytida xabar berildi.
Tashabbus 15 oktyabr kuni Shveysariyaning Syurix shahrida bo‘lib o‘tgan FIFA kengashi yig‘ilishida taqdim etildi. Investisiyalarni oshirish tashkilot zaxira mablag‘lari hisobidan amalga oshirilishi taklif qilinmoqda. Ushbu mablag‘lar, jumladan, 2026 yilgi Jahon chempionatidan tushadigan daromadlar hisobiga shakllangan.
Rejaga ko‘ra, 211 ta milliy futbol assosiasiyasining har biri 25 million dollargacha mablag‘ olishi mumkin. Qo‘shimcha mablag‘larni ayollar va yoshlar futboli, infratuzilma hamda uzoq muddatli loyihalarni rivojlantirishga yo‘naltirish ham ko‘zda tutilgan.
Dasturning yakuniy shartlarini 2026 yil dekabr oyida kelishib olish rejalashtirilgan.
