Argentina terma jamoasi bosh murabbiyi Lionel Skaloni Jahon chempionatidan so‘ng muxlislarga murojaat qildi.
JCH-2026 finalida (19 iyul kuni) Argentina Ispaniyaga imkoniyatni boy berdi (0:1, qo‘shimcha vaqtda).
«G‘am-anduh quvonch bilan, yoshlar tabassum bilan, qalb og‘rig‘i esa xotirjamlik bilan qorishib ketgan shiddatli haftadan so‘ng, nihoyat o‘tirib bir nechta so‘z yozish imkoniyatiga ega bo‘ldim. Men ijtimoiy tarmoqlarni uncha xush ko‘rmasligimni bilsangiz-da, ehtimol, bu fikrlarimni sizga yetkazishning eng yaxshi yo‘lidir.
Menga faqat sizga yana bir kubokni olib kela olmaganim va hayotiy tashvishlarni bir necha kunga bo‘lsa-da unuttiradigan quvonchni qayta taqdim eta olmaganim uchun kechirim so‘rash qoladi, xolos.
Lekin men sizning futbolchilar — ayolimga aytganimdek, mening jangchilarim bilan birga sizga ko‘rsatishga harakat qilgan narsalarimizga sodiq qolishingizni xohlayman. Mehnat, ishtiyoq, iroda, vaziyat qanchalik og‘ir tuyulmasin taslim bo‘lmaslik, qo‘lingizda hech narsa qolmaganida ham bor-budingizni berish, bizni bilmaydiganlarning sovuq gaplariga chidash, o‘z maqsadlaringizga erisha olish va oyoqlaringiz madorsizlanganda ham tik tura olish... Mana shu haqiqiy kubokdir.
Men o‘z murabbiylar shtabimdan, futbolchilardan, AFA (Argentina futbol assosiasiyasi) xodimlaridan, bizga qulaylik yaratib beradiganlardan va sizning har biringizdan cheksiz minnatdorman. Kimning argentinalik do‘sti bo‘lsa, demak, uning qo‘lida haqiqiy xazina bor», — deb yozdi Skaloni.
