Inglizlar Jahon chempionati boshlanishidan oldin o‘rtoqlik uchrashuvi o‘tkazish uchun yana bir raqib topishdi. «The Mirror» nashri xabariga ko‘ra, Angliya terma jamoasiga Kosta-Rika raqiblik qiladi.
Uchrashuv 10 iyun kuni bo‘lib o‘tadi. Avvalroq inglizlar 6 iyun kuni Yangi Zelandiya bilan o‘rtoqlik o‘yinida to‘qnash kelishi ma’lum bo‘lgan edi. Har ikki bahs AQSHda, Floridadagi mashg‘ulot bazasi yaqinida o‘tkaziladi, biroq aniq manzil hozircha belgilanmagan.
Angliya va Kosta-Rika shu kungacha ikki bor to‘qnash kelishgan. 2018 yildagi o‘rtoqlik uchrashuvida inglizlar Markus Reshford va Denni Uelbekning gollari evaziga 2:0 hisobida g‘alaba qozonishgan bo‘lsa, undan 4 yil avval Jahon chempionati guruh bosqichida jamoalar nursiz durang (0:0) qayd etishgan.
Tomas Tuxel shogirdlari 17 iyun kuni Jahon chempionatidagi ishtiroklarini Xorvatiyaga qarshi o‘yin bilan boshlashadi. Shuningdek, ushbu guruhdan Gana va Panama terma jamoalari joy olgan.
