Xalqaro shaxmat federasiyasi (FIDE) amaldagi Jahon chempioni, hindistonlik Gukesh Dommaraju hamda Da’vogarlar turniri g‘olibi, o‘zbekistonlik grossmeyster Javohir Sindorov o‘rtasidagi Jahon toji uchun kechadigan bahsning joyi va sanasini rasman e’lon qildi. Qayd etilishicha, ushbu to‘qnashuv joriy yilning 25-noyabridan 15-dekabriga qadar Shveysariyaning Jeneva shahrida bo‘lib o‘tadi.
Musobaqaning mukofot jamg‘armasi 2,5 million dollarni, tadbirning umumiy byudjeti esa 8,5 million dollarni tashkil etadi. O‘yin reglamentiga ko‘ra, bahslar 14 ta partiyadan iborat bo‘ladi va chempionlikni qo‘lga kiritish uchun shaxmatchilardan 7,5 ochko jamg‘arish talab etiladi. Agar ishtirokchilardan biri ushbu natijaga belgilangan partiyalardan avvalroq erishsa, bahs muddatidan oldin yakunlanadi. Asosiy o‘yinlar yakunida hisob 7:7 ko‘rinishida durang bilan tugasa, g‘olibni aniqlash uchun tay-breyk o‘tkaziladi.
Ma’lumot uchun, hindistonlik Gukesh Dommaraju 2024-yilning dekabr oyida Singapurda o‘tkazilgan uchrashuvning 14-partiyasida xitoylik Din Lijen ustidan g‘alaba qozonib, jahon chempioniga aylangan edi. O‘shanda u 18 yoshida FIDE tarixidagi eng yosh jahon chempioni nomini olib, 1985-yilda (22 yoshida Anatoliy Karpovni mag‘lub etgan) Garri Kasparovning o‘rnatgan rekordini yangilagan.
O‘zbekistonlik grossmeyster Javohir Sindorov esa Kiprning Pafos shahrida o‘tkazilgan 2026-yilgi Da’vogarlar turnirida ishonchli ishtirok etib, muddatidan avval g‘oliblikni qo‘lga kiritgan. U musobaqadagi 14 ta partiyada jami 10 ochko jamg‘arib, birorta ham mag‘lubiyatsiz (6 ta g‘alaba va 8 ta durang) natija qayd etdi va Jahon toji uchun asosiy da’vogarga aylandi.
E’tiborli jihati, ushbu bellashuv shaxmat tarixidagi eng yosh grossmeysterlar ishtirokidagi chempionlik bahsi hisoblanadi. Uchrashuv o‘tkaziladigan vaqtda har ikki sportchi ham 20 yoshda bo‘ladi.
